Ах, Москов...

Минек велень аватне
Важодить, прок трямот:
Малав весе цёратне
«Оргодсть» халтурямо.

Ардыть, нучкить тей ды тов!
Синдить, вант, прят-полдат!
Янксить — «Кобале-Москов»
Поезд мекс эзть нолда.

Ах, Москов, тон прок маяк!
Тезэнь весе кельгить.
Натой Тумо Петяяк
Сась теть ярмак мельга!

Кадовсть озимть апак видть,
Паксят апак сока…
Пелькстасть ават апак виздть,
Кинь мирдесь сех дока.

Келя, ки покш ярмакт усксь,
Маризе сынст танстенть,
Се валаня яннэ мусь
Сюпалгадомантень.

Эно Пазось тенст судьякс,
Бути истят мелест.
Ансяк мон арсян лиякс:
Сюпавчись – те велем!

Кие вачодо кулось?
Моданок свал анды!
А весенень Московось
Покш уцяска канды.