Эрзянь масторонтень

Э́рзянь ма́сторсо — и́нзеень валскеть!
Товсюро́сь иневеде́кс лымба́кстни!
То́лкункс ви́ртне чии́ть па́ндопря́сто,
Сэнь черьве́тстекс лее́сь чу́ди са́сто.

Эрзянь ма́сторсо, ме́лезэть ле́ди,
Ве́се ло́мантне — па́нжадо се́дейть,
Ва́лдо прят, ёроко́вт, важоди́цят,
Те́вень со́дыцят ды мизолды́цят.

Бу́ти э́рзянь моро́сь ушодо́ви —
Лужаня́сто пакся́ва уско́ви,
Со́ви ви́рев, сравто́ви луга́ва,
Эрьке велькссэ нурьги́, па́ндопря́ва...

Пу́рны ксты́йть, мастума́рть, пештеть-пангот,
Ве́ренть ма́рто чу́ди э́рьва са́нга!
Лисьмапрясо симе́ма ява́вты
Ды кува́ка кила́нгов ильтя́вты.

Э́рзянь мо́данть певте́ме мазы́зэ:
Тезэнь ёвксосто сыть те́лесь-ки́зэсь!
Тесэ се́деень пе́тиця чи́тне,
Тезэнь ве́тить свал ва́солдонь ки́тне!

Тезэнь я́ла лотка́кшнан ойма́мо,
Оймеви́ень пачко́лян пурна́мо!
Э́рзянь масторонть се́дейсэнь ка́ндтнян,
Зя́рдо веёнга ру́нгосон сра́втнян…