Набой авадо

Неень шкане тейтерьавась
Цёранть эйстэ васов явовсь:
Машты сонсь эсь прянзо трямо
Ды пек сюпавсто эрямо.
Чии сэрей кочкарясо,
Свал мазыйстэ пурназь прязо,
Чипайкс цитни кенже марто,
Мако турватне свал артозь.
Чистэ мазыекс сон эри,
Истя эрьва ков кенери:
Тонавтнеме, важодеме
Ды пек тантейстэ пидеме,
Ваньксстэ кудонь урядамо,
Эйкакшонзо ломанькс трямо!
Ламо тевть лият муевить,
Конань авань кедтне теить…
Ней авась — эсь прянзо триця,
Ансяк икелев молиця!
Сон мазынзэ перька сравты,
Моданть тевсэнзэ чаравты!
Тетькси сельметь цёраломань,
Ваны лангозонзо стомазь…
Сельгеть нильни, прязо вели,
Ансяк пшкадемс тензэ пели…
Те авась, нать, арсемс сави,
Цёратненень а сасави!
Карязт яжи коткудавокс…
Ансяк ойменть мари чавокс!
Ули мартонзо эриця…
Те — кудонь парсте ванстыця
Сехте вечкевикс ялгазо…
Крендель пулыне кисказо.